يامل عين في محاجيرها شوك

يا مل عينٍ في محاجـيرها شوك

والقلب به عن لذة الــنوم تكـاك

لا دك في قلبي من الهم داكوك

جاوبت طربات الحمايم على الراك

عزي لحالك يا عزيز وأنا ابوك

كان الزمان اللي توطاني توطاك

إفهم وصاتي يا عزيز وأنا ابوك

دامك صغير وغاية العـلم يقراك

تراه ما ينــفعك خالك ولا أخـوك

لا صار ما تقضي لزومك بيمناك

وربعك ليا بان الخلل فيك عافـوك

أقرب قريب ٍ لك من الناس يشناك

إن كثر مالك صدقواّ لك وطاعـوك

وإن قل ما بيديك شانت حلايـاك

لو تطلب الما عندهم كان ما أسقوك

إبعد مزارك عن وطنهم ومـرباك

وإن طاب حظك صدقوّا لك وحبوك

وإن بار كلن ما يبي غير فرقاك

وإلا إعترض لك من صروف الـنيا صوك

كلن تبرا منك ماهــوب ويـــاك

هراجة المجلس إلى ـيت وروك

منازل ٍ تطرب نظيرك بدنـــياك

وإللا قضى منك اللوازم وخلـــوك

تفرقوا وأنت إحتمل كل ما جــاك

كنك سراج البيت للنور شـبوّك

وإلى إنقضى اللازم حدا الربع طفاك

وألا كما ليمونة الحمض مصوك

وإلا قضى منها الطعم فرغـوا ذاك

واللي يجي من رفقته ريب وشكوك

إحذر عنه لياك تصدف بمــسراك

وإلا جفوك أهل الوطن وإســتخفوك

قلّع غريسك منه وإهدم ركايـاك

تراك لو تنجع على الربع صـعلوك

أحسن من اللي نلتجي به وياطاك

عطهم وضيفهم إلا منهم جـوك

وإغلق ضميرك لا تعلم بقصـياك

إن طبت ما حبوّك وإن عبت زالوك

تمضي حياتك ناقل ٍ داك بريـاك

وإلى نفوك إمن الوظيفه وعافوك

خفتّ موازينك وكلن تهــقواك

وإصحى لخلان الرخا لو تغالوك

إعرف ترى أطيبهم إلى إحتجت يجفاك

كنك خوي مقيط دهووك وأغــووك

وحقك عطاك رشاك وأقفى وخـلاك

وإحذر عن العلة ترى الحق مدروك

مثل العمل يدركك ما منه فكاك

وإن كان عدوانك على الضيق حدوك

فإخصم طلابتهم بعجفاك وقـداك

وإن كانهم لمشرّف الحق ماشوك

ناظر مطاليع الفرج قبل مبداك

وإن طاوعوا شيطان الأنفس وهانوك

فإصبر على البلوى ودفنك رزاياك

زرهم تراك إليا تونيت زاروك

إن ما بديت لصاحب السو يبداك

ما دامهم ما طاوعـوا لك وعرفوك

إضرب على الكايد إلى عمست رياك

لو هذبوك إمن المصاوب وضـدوك

ما يذبحونك قبل تدني مناياك

وإحلم على الجاهل ترى الحلم مبروك

وقم للضعيف اللي من الظيم ينخاك

وإدمح خطاجيران بـيتك إلى أوذوك

ترى القصير وحرمة الجار بحماك

عطهم لوازم حقهم لو تناسـوك

في كل ما يصلح لدينك ودنـياك

وقم للضيوف اللي لفوا لك وضافوك

أغلى كرامتهم حجاجك وبشراك

وإعرف ترا مالك للأضياف مشـروك

لولاه يطلب حاجته منك ما جــاك

وقم للرجال إن رايعوا لك وحبوك

وإحشم خويك وأكرمه عند ملفاك

وإلى إعتبرت بسيرة الناس كفــوك

ما كثر من شي أتعبك ثم عـــــــناّك

ولولا تبات بهمّ دنياك مظـنوك

ما طاب لك ما دام لك وإفتـهم ذاك

لو يطلبون إخفايك الناس ما أخفوك

الرجل مثل النجم في كل الأفــــلاك

وصلاة ربي عدّ الأوراق والشوك

أو ناض براق ٍ وما هل سـفاك

على الذي ما فيه ريب ٍ ولا شكوك

امحمد ٍ ما دك بالقــــلب دكاك

سليمان الشريم