يا كليب
ياكليب شب النار ياكليب شبه
عليك شبه والحطب لك يجابي
وعلي أنا ياكليب هيله وحبه
وعليك تقليط الدلال العذابي
وادغث له ايا كليب من سمر جبه
وشبه إلى منه غفا كل هابي
باغ إلى شبيتها بالمشبه
تجذب لنا ربع سرات غيابي
بنسرية ياكليب صلف مهبه
متكتفين وسوقهم بالعقابي
سراة بليل وناطحين مهبه
لا نسنست كن به سم دابي
خطو الولد لو به زبون وجبه
يأتي عليهم من حساب الزهابي
لا باطن الهلباج خطو الجلبه
ياحلو خبط اعصيهم بالركابي
اطمر لهم وابدي سلام المحبه
لاجو على هجن يديهم خرابي
مع كبش مصلاخ لك الله نجبه
لادبر الهين متين العلابي
والوالمه ياكليب عجل بصبه
والرزق عند اللي ينش السحابي
دغيم الظلماوي