أهوش بسلاحي
الما .. ركد والجريد الغض ماهزه
نسايم والزمن لاجا ولا راحي
جمت يامهر حظي واثربك فزة
ما طولت كلها غارة ومشواحي
لو كنت رمح بكفي كان باهزه
لا شك من هو عليه اهوش بسلاحي
ولو كنت بيرق عقيد وين ابارزه
واطول طويل أشوفه هضبة جراحي
يا سيد الناس شمسك مالها حزه
تعبت اماري بشمعي وضي مصباحي
من مس نورك جينة يبشر بعزه
ومن مر غيمك عتيمه بارقه لاحي
يا سيد الناس كل لابس بزه
صعب نفرق ما بين الخيل والصاحي
كم واحد مر وقال عيوني تخزه
هو مادرى اني عمى عن قاصر اشباحي
أنا عيوني تتل النجم وتكزه
عن حارك الفلك هذي عادة رماحي
مالوم حظي تعب من كثر ما اذره
لو هو لغيري نساه الهم وارتاحي
بدر بن عبدالمحسن